Президент Садыр Жапаров бүгүн, 29-августта, Жалал-Абад облусуна болгон иш сапарынын алкагында Улуттук коопсуздук мамлекеттик комитетинин жана УКМКнын Чек ара кызматынын кызматкерлери үчүн курулган жаңы турак жай комплексинен батирлердин ачкычтарын тапшырды. Бул тууралуу президенттин маалымат кызматы билдирди.
Мамлекет башчысы өз сөзүндө өлкөдө Кыргызстандын Куралдуу күчтөрүн чыңдоого, өзгөчө улуттук коопсуздук органдарына жана чек ара кызматынын ишмердүүлүгүнө чоң көңүл бурулуп жатканын белгиледи.
“Мамлекет тарабынан аскер кызматкерлерине жаңы турак-жай куруу, заманбап кызматтык имараттарды салуу, кызматтык унаалар менен камсыз кылуу жана башка тийиштүү шарттарды түзүп берүү иштери тынымсыз уланууда.
Мынакей жакында эле улуттук коопсуздук органдарынын кызматкерлери, ардагерлери жана алардын үй-бүлөсү менен жакындары үчүн Ысык-Көл облусунда “Айкөл” жана Арстанбап айылында “Ак илбирс” ден соолукту чыңдоо борборлорун капиталдык ремонттон өтүп, колдонууга берилгенине баарыбыз күбө болдук.
Бүгүнкү салтанаттуу иш-чара дагы өлкөбүздүн Куралдуу күчтөрүнө карата мамлекет тарабынан көрүлүп жаткан камкордуктун бир бөлүгү десек туура болот”, — деди Садыр Жапаров.
Ошону менен бирге президент УКМКнын Жалал-Абад облусу боюнча Башкы башкармалыгы үчүн турак-жай комплекси быйыл биринчи жолу курулганын маалымдады. Анда 180 батирдин 95и үч бөлмөлүү, 55и эки бөлмөлүү жана 30у бир бөлмөлүү. Батирлердин жалпы аянты 11233 чарчы метрди түзүп, курулуш иштерине 540 млн. сом акча каражаты сарпталды.
“Бүгүнкү күндө комплекстин аймагында кызматкерлердин балдары үчүн 120 орундуу бала-бакча жана аскер госпиталынын курулушу кызуу жүрүп жатканын айта кетейин. Ал эми спорт залдын курулушу дээрлик аяктап калды. Аз убакытта бул обьектилерди дагы салтанаттуу түрдө ачып, тапшырып беребиз.
Биз жоокерлерибизге, аскер кызматычыларыбызга алгач керектүү шарттардын баарын түзүп, анан катуу талап коебуз. Анткени улуттук коопсуздук, Ата Мекенибиздин бүтүндүгү баарынан кымбат турат. Шалаакылык кылып, ката кетирүүгө эч кимдин акысы жок”,- деп баса белгиледи Садыр Жапаров.
Мамлекет башчысы аскер кызматкерлерине мамлекет тарабынан көрсөтүлүп жаткан колдоо аларды татыктуу кызмат өтөөгө түрткү бериши керектигин белгиледи.
Сөзүнүн аягында Садыр Жапаров бул багыттагы иштер мындан ары да улана берерин баса белгилеп, күч түзүмдөрүнө, чек арачыларга, ардагерлерге, алардын жакындарына чың ден соолук, кажыбас кайрат жана үй-бүлөлүк бакубатчылык, ал эми Кыргызстанга туруктуулук жана гүлдөп өнүгүү каалады.
Биздин Телеграм каналга катталыңыз
