Тажикстанда өтө турган эки ири ишчарага президент Садыр Жапаров катышат. Бул тууралуу Тажикстандын Тышкы иштер министрлиги билдирди.
Маалыматка ылайык, 16-17-сентябрда Душанбеде Жамааттык коопсуздук келишим уюмуна (ЖККУ) жана Шанхай кызматташтык уюмуна (ШКУ) мүчө өлкөлөрдүн башчыларынын жолугушуусу өтөт.
Өлкө башчылары Ооганстандагы кырдаал боюнча талкуулашат. Иш-чара Тажикстандын президенти Эмомали Рахмондун төрагалыгы алдында өтөт.
ЖККУнун сессиясына Армениянын премьер-министри, Беларусь, Казакстан, Кыргызстан, Орусиянын президенттери жана ЖККУнун Башкы катчысы катышат.
Мындан тышкары, 17-сентябрда өтө турган ШКУ жыйыны уюмдун түзүлгөнүнүн 20 жылдыгына арналат. Иш-чарага Индиянын премьер-министри (онлайн), Казакстандын, Кыргызстандын, Өзбекстандын, Беларусиянын, Түркмөнстандын, Россиянын, Ирандын президенттери, Кытайдын лидери жана Монголиянын президентти (онлайн) Пакистан премьер-министри катышат.
