Өзгөчө кырдаалдар министрлиги 16-марттан 18-мартка чейин туруксуз аба ырайына байланыштуу Кыргызстандын тоолуу райондорунда жана бир катар унаа жолдорунда кар көчкү түшүүсү менен кар күрткүсү күтүлөрүн маалымдады.

Кар көчкү коркунучу бар жол тилкелери:

• Бишкек-Ош жолу: 198-255-чакырымдар (Ала-Бел ашуусу, Чычкан капчыгайы);
• Мырзаке-Кара-Кулжа-Алайкуу жолу: 55-115-чакырымдар;
• Бишкек-Нарын-Торугарт жолу: 292-305-чакырымдар (Долон ашуусу);
• Балыкчы-Казарман-Жалал-Абад жолу: 201-205, 260-290 жана 326-349-чакырымдар (Көк-Арт ашуусу);
• Каракол-Эңилчек жолу: 45-90-чакырымдар (Чоң-Ашуу ашуусу).

Аталган аймактарда жолдор тайгак болуп, муз тоңот. Коопсуздукту камсыз кылуу үчүн унаалардын ортосунда 500 метр аралыкты сактоо зарылдыгы эскертилет.