ИИМдин Жол кыймылынын коопсуздугун камсыздоо башкы башкармалыгынын (ЖКККББ) инспекторлору жол эрежелерин бузган айдоочуларга протоколдорду электрондук түрдө түзө башташат. Бул тууралуу ЖКККББнын басма сөз катчысы Байказы Айтикул уулу “Биринчи радионун” эфиринде билдирди.

Анын айтымында, өлкө башчынын бардык мамлкеттик кызматтардын ишмердүүлүгүн санариптештирүү боюнча берген тапшырмасына ылайык, ЖКККББ да жакынкы аралыкта электрондук протоколдорду түзүү нормасына өтөт.

“Кагаз иштери азаят, ишмердүүлүктүн бардыгы электрондук түргө өтөт. Эми жол эрежесин бузган айдоочуга кагазга эмес, планшет аркылуу электрондук протокол түзүлөт. Бул жакынкы күндөрү, октябрь-ноябрь айларында күчүнө кирет”,- деп билдирди басма сөз катчы.