Бир жуманын ичинде Бишкекте мас абалындагы 42 айдоочу кармалды. Бул тууралуу борбор калаанын Патрулдук милиция кызматынын жетекчилиги билдирди.
Маалыматка ылайык, жалпысынан 5 миң 14 жол эрежесин бузуу фактысы аныкталган. 11 айдоочу караңгылатылган унаа айдап бара жаткан, 23 айдоочу айдоочулук күбөлүгү жок токтотулган, 2 айдоочу жасалма номур менен унаа башкарган, 157 жөө жүргүнчү жана велосипедченге да айып пул салынган, 4779 башка эреже бузуулар боюнча айып пул салынган.
Патрулдун кызматкерлери жарандардан өздөрүнүн коопсуздугу үчүн жол эрежесин так сактоону суранат.
