Улуттук коопсуздук мамлекеттик комитети тарабынан коррупцияга шектелип, «Айыл Банк» ААКнын бир катар жооптуу кызматкерлери кармалды. Бул тууралуу УКМКнын басма сөз кызматы билдирди.
Маалым болгондой, КРнын Кылмыш-жаза кодексинин 336-беренеси «Коррупция» менен козголгон кылмыш ишинин алкагында акциялары мамлекетке таандык «Айыл Банк» ААКсында коррупциялык схема текшерилүүдө. Анда кредиттик каражаттар максаттуу колдонулган эмес.
«Айыл Банк» ААКсы 2017-жылы «Россиф» ЖЧКсына күрөөнүн баасын жасалма жогорулатуу менен 3,5 миллион доллар (295,7 миллион сом) насыя бергени көрсөтүлгөн. Мамлекеттик соттук-эксперттик кызматынын маалыматы боюнча көрсөтүлгөн 348,5 миллион сомдун ордуна 271,8 миллион сомду гана түзгөн. Ошентип сметалык наркынын айырмасы 76,6 миллион сом болгон.
Жүргүзүлгөн ыкчам-иликтөө иш-чараларынын негизинде 8-февралда УКМК тарабынан «Айыл Банк» ААКнын төрт жооптуу кызматкери – М.Н.Т., Ш.У.Ж., С.М.А. жана А.Ж.А. кармалган.
Банк түзгөн туруктуу коррупциялык схема кредиттерди берүүдө коммерциялык субъекттердин кызыкчылыктарын лоббирлөөдө туюндурулганы көрсөтүлгөн. Кармалгандардын баары УКМКнын убактылуу кармоочу жайына киргизилди.
