Орус армиясында кызмат өтөгөн дагы бир кыргызстандык Адилет Алиев Украинада каза болду. Бул тууралуу Кыргызстандын Орусиядагы элчилиги билдирди.

Маалыматка ылайык, Адилет Алиев Орусиянын Куралдуу күчтөрүнүн катарында контракт боюнча кызмат өтөгөн жоокер болгон.

Буга чейин Кыргызстандын алты жараны — Эгемберди Дорбоев, Рустам Зарифуллин, Исламжон Камилов, Сыргакбек Өзүбеков жана Аманбек Курбанбаев, Руслан Полотов Украинадагы согуштук аракеттерде курман болгон.

Эске салсак, Украинадагы кырдаал оор бойдон калууда. Уруш уланууда. Орусия 2022-жылдын 24-февралында атайын аскердик операция жарыялаган.