Былтыр 2022-жылга караганда үй-бүлөлүк зомбулук 32,6%га көбөйгөн. Бул тууралуу акыйкатчы Жамиля Жаманбаева Жогорку Кеңештин тармактык комитетинин жыйынындагы баяндамасы учурунда билдирди.
Анын айтымында, 2022-жылы үй-бүлөлүк зомбулук боюнча 9 миң 880 учур катталса, 2023-жылы андай фактылар 13 миң 104кө жеткен (3 миң 224кө көбөйгөн же 32,6%га). Мурдагы жылы зомбулукка кабылгандарга 8 миң 225 коргоо ордери, 2023-жылы 10 миң 884 ордер берилген.
Былтыр Кыргызстанда 187 аял жана 185 бала өз жанын кыйган. Мындай кейиштүү көрүнүштөр көбүнчө үй-бүлөдөгү зомбулук менен байланыштырылат.
