Баткендеги Зардалы айылына кеткен жалгыз жолду кеңейтүү иштери жүрүүдө. Бул тууралуу Транспорт министрлигинен билдиришти.
Маалым болгондой, Кыргызстандагы алыскы айылдардын бирине кеткен Сох – Кан — Зардалы жолунун узундугу 85 чакырымды түзөт. Учурда жолчулар 78-85-чакырымдардагы бир унаа араң өтө турган жерлерди тазалап, кеңейтүү иштерин алып барууда.
«Белгилей кетсек, Зардалы – Баткен облусунун бийик тоолуу айылы. Кышы абдан катаал келген Зардалыны башка айылдар менен жалгыз бир гана унаа жолу туташтырат. Жол жыл сайын май-июнь айларында ачылып, кыш түшкөнгө дейре каттам үзүлбөйт», — деп билдирет министрлик.
