Бүгүн, 27-майда, Жогорку Кеңештин төрагасы Нурланбек Тургунбек уулу Арменияга болгон расмий сапарынын алкагында бул өлкөнүн премьер-министри Никол Пашинян менен жолугушту.
Жолугушууда Кыргызстан менен Армениянын ортосундагы саясий, экономикалык жана маданий-гуманитардык кызматташтыкты мындан ары да өнүктүрүү маселелери талкууланды. Төрага Тургунбек уулу Кыргызстан бардык багыттар боюнча кызматташууга кызыкдар экенин белгилеп, өз ара алакаларды жаңы деңгээлге чыгаруу үчүн парламенттер аралык жана өкмөттөр аралык байланыштарды жандандыруу зарылдыгын айтты.
Ошондой эле ал ЕАЭБ алкагындагы бирдиктүү экономикалык мейкиндиктин мүмкүнчүлүктөрүн пайдаланып, соода жүгүртүүнү жогорулатуу керектигин баса белгиледи.
Өз кезегинде Никол Пашинян жолугушууга канааттануусун билдирип, бул сапар эки тараптуу мамилелерге жаңы дем бере турганын белгиледи. Ал айыл чарба жана туризм тармактарында кызматташуу мүмкүнчүлүктөрүнө токтолуп, Кыргызстандагы реформалар жана коррупцияга каршы саясат боюнча тажрыйба алмашууга даяр экенин билдирди.
Жолугушууда Бишкек менен Еревандын ортосунда түз аба каттамын ачуу демилгеси көтөрүлүп, мунун жарандар жана бизнес өкүлдөрү үчүн чоң мүмкүнчүлүктөрдү түзөрү айтылды.
Мындан тышкары, жолугушууга катышкан “Ата-Журт – Кыргызстан” фракциясынын лидери Бактыбек Сыдыков транспорттук-логистикалык маселелер боюнча сунуштарын берип, бул жаатта Армениянын парламенттик комитеттери менен да байланыштар түзүлгөнүн маалымдады.
