24-июлдан бери Сары-Таш окуу талаасында артиллериялык бөлүкчөлөрдүн кезектеги талаа жыйыны өтүүдө. Бул тууралуу Кыргыз Республикасынын Коргоо министрлиги билдирди.

Окуу жыйынына Куралдуу күчтөрдүн Түштүк-Батыш оперативдик командачылыгынын жана Чек ара кызматынын артиллериялык бөлүкчөлөрүнүн өздүк курамы тартылган. Аскерлер тактикалык даярдыкты жогорулатуу, ок атуу көнүгүүлөрүн жана чогуу аракеттенүүнү үйрөнүү багытында машыгууларды өткөрүүдө.

Жыйындын жүрүшүндө аскер кызматкерлери ар кандай шарттарда ыкчам чечим кабыл алуу, бөлүктөр аралык өз ара аракеттерди координациялоо жана практикалык көндүмдөрдү тереңдетүү боюнча даярдыктардан өтүшөт.

Коргоо министрлигинин маалыматына караганда, мындай окуулар аскердик жөндөмдүүлүктү жана аймактык коопсуздукту камсыз кылуу максатында өткөрүлүп жатат.