Кыргызстан менен Беларустун Коргоо министрликтеринин ортосунда 2026-жылга карата эки тараптуу кызматташуу планына кол коюлду. Бул тууралуу КРдин Коргоо министрлиги маалымдады.

Документке Кыргызстандын коргоо министри Руслан Мукамбетов менен Беларустун коргоо министри Виктор Хрениндин Бишкектеги жолугушуусунда кол коюлду. Жолугушуу Жамааттык коопсуздук келишим уюмуна (ЖККУ) мүчө мамлекеттердин Коргоо министрлеринин кеңешинин жыйынынын алкагында өттү.

Анда эки өлкөнүн коргоо мекемелеринин ортосундагы эки тараптуу кызматташуунун эң актуалдуу маселелери талкууланган.

Руслан Мукамбетов өз сөзүндө Кыргызстан менен Беларустун ортосунда кызматташтыкка негизделген салттуу достук мамилелер бар экенин билдирген.

“Тарыхый жана саясий контекстте биздин өлкөлөрдүн ортосунда карама-каршылыктар да, чечилбей келген маселелер да жок. Кыргыз Республикасы менен Беларусь Республикасынын мамилелерин кеңейтүү жана бекемдөө үчүн чоң потенциал бар», – деген ал.

Бүгүн, 27-ноябрда, Бишкекте ЖККУнун кезектеги жыйыны өтүүдө. Ага Кыргызстандын президенти Садыр Жапаров, Беларустун президенти Александр Лукашенко, Казакстандын өлкө башчысы Касым-Жомарт Токаев, Орусиянын президенти Владимир Путин жана Тажикстандын башчысы Эмомали Рахмон катышууда.