Бишкектин мэри Айбек Жунушалиев Транспорт каражаттарын жана айдоочулук күбөлүктү каттоо боюнча агенттиктин «Биримдик-Кут» конушунда жайгашкан бөлүмүнө текшерүү менен барды. Бул тууралуу Бишкек мэриясы билдирди.

Мэр бөлүмгө кирип барып, ал жакта узун кезек бар экенин, бирок 12 тейлөө терезесинин төртөө гана иштеп жатканын көргөн. Ал бөлүмдүн жетекчилигин чакыртып, калган кызматкерлерди ишке чыгарууну тапшырган.

“Өзүңөрдүн ишиңерди тууралагыла. Мамлекет силерге шарт түзүп берген. Эмнеге иштебей жатасыңар? Иштеткиле, баарын толугу жумушка чыгаргыла. Канча деген элди кыйнап атасыңар”,- деген ал.

Ошондой эле Жунушалиев сырттагы унаалардын башаламан токтотулуп турганын көрүп, жарандар кечки убакта тыгын жаралып жатканын айиып нараазы болуп жатышканын айткан. Ал Кайгуул кызмат башкармалыгынын кызматкерлерин чакыртып, унаа токтотууга тыюу салуучу белгилерди орнотууну тапшырган.

Мэр барып кеткенден кийин аталган бөлүмдө 12 терезе тең иштеп баштаганы маалымдалды.