Бишкек шаарынын мэри Айбек Жунушалиев шаардык мэриянын Жер пайдаланууну көзөмөлдөө башкармалыгына Чынгыз Айтматов проспектиси тараптагы жер тилкелери боюнча берилген 29 доо арызды соттон кайтарып алууну тапшырды.

Бул чечим талаш маселелерди сотко жеткирбестен, сүйлөшүү жолу менен чечүүгө жана жер ээлери менен натыйжалуу өз ара аракеттенүүнү түзүүгө багытталган.

Ленин районунун акииги жарандарга баасы жана аянты жагынан тең альтернативалуу жер тилкелерин сунуштоо милдетин алды. Эгер тургундар макул болбосо, учурдагы мыйзамдарга ылайык кадастрдык баасы менен компенсация төлөө маселеси каралат.

Мэрия жер пайдаланууга байланышкан бардык маселелер Кыргыз Республикасынын мыйзамдарынын алкагында чечилишине шарт түзүү боюнча ишин улантат.

Эске салсак, Чынгыз Айтматов проспектисин кеңейтүү иштери башталгандан бери «Киргизия-1» турак жай массивинин тургундары өз айрым жер тилкелеринен ажыраган. Адегенде жеке менчикти ырастаган кызыл китеби жок жарандардын тосмолору алынып салынган. Кийин бардык документтери так болгон тургундар да өз жеринин бир бөлүгүнөн ажырап калышкан.

Андан кийин мэрия айрым жер тилкелерин мыйзамсыз деп табуу үчүн шаардыктарды сотко берген. Өз кезегинде тургундар да жеке менчигинен ажыраганы үчүн компенсация талап кылып муниципалитетке каршы сотко кайрылышкан. Алар бир нече жолу президентке жана УКМК жетекчисине мэриянын мыйзамсыз аракеттери боюнча даттанышкан.