Президент Садыр Жапаров Россия Федерациясына жумушчу сапары менен барды. Мамлекет башчысынын учагы «Пулково» эл аралык аэропортуна конду, ал жерден аны Санкт-Петербургдун губернатору Александр Беглов жана башка расмий адамдар тосуп алышты. Бул тууралуу КР Президентинин басма сөз кызматы билдирди.

Сапардын программасында иш-чаралардын жыш графиги каралган. Садыр Жапаров Жогорку Евразиялык экономикалык кеңештин жыйынына катышат, ошондой эле Көз карандысыз Мамлекеттер Шериктештигине (КМШ) мүчө мамлекеттердин башчыларынын салттуу бейформал жолугушуусуна барат. Мындан тышкары, Россиянын президенти менен эки тараптуу жолугушуу пландалган, анын жүрүшүндө лидерлер мамлекеттер аралык мамилелердин негизги өңүттөрүн талкуулашат.

Алдыдагы сүйлөшүүлөрдүн көңүл борборунда евразиялык экономикалык интеграцияны тереңдетүү, соода-экономикалык жана каржылык кызматташтыкты кеңейтүү, ошондой эле энергетика тармагындагы кооперацияны чыңдоо жана каботаждык ташууларды өнүктүрүү маселелери болот.

Сапардын жыйынтыгы менен ЖЕЭК жана КМШ күн тартибинин алкагында өлкөлөрдүн мындан аркы өз ара аракеттенүүсүн аныктаган бир катар чечимдердин кабыл алынышы жана документтерге кол коюлушу күтүлүүдө.