Парламенттин спикери Нурланбек Тургунбек уулу Жогорку Кеңештин аппаратынын жетекчилиги жана бөлүм башчылары менен кеңешме өткөрдү. Жолугушуунун башкы темасы парламенттин жаңы, VIII чакырылышынын ишин уюштуруу маселеси болду. Бул тууралуу Жогорку Кеңештин басма сөз кызматы билдирди.

Кеңешмеге төраганын жаңы орун басарлары: Чыңгыз Ажибаев, Жылдыз Таалайбек кызы жана Карим Ханджеза да катышты.

Мыйзам чыгаруу органынын башчысы парламенттин иштөө форматын кайра түзүү тапшырмасын койду.

Нурланбек Тургунбек уулунун негизги талабы мыйзам долбоорлорун кароо жол-жобосуна тиешелүү болду.

«Натыйжалуулукту арттыруу үчүн мыйзам долбоорлорун талкуулоо Жогорку Кеңештин жалпы жыйындарында эмес, тармактык комитеттердин деңгээлинде өтүшү керек. Депутаттар өз сунуштарын дал ошол жактан киргизүүгө тийиш», — деп баса белгиледи төрага.

Спикер кабыл алынып жаткан мыйзамдардын сапаты алардын комитет баскычында канчалык терең иштелип чыкканына түздөн-түз көз каранды экенин белгилеп, аппарат кызматкерлерине документтерди өз убагында жана сапаттуу даярдоону камсыздоону тапшырды.