Кемин районунун Боролдой айылында Кызыл китепке кирген ак илбирстин пайда болгону катталды. Окуя 29-декабрда саат 23:20 чамасында болгон.

КР Жаратылыш ресурстары, экология жана техникалык көзөмөл министрлигинин маалыматы боюнча, жырткыч калктуу конушка түшүп келип, бакка чыгып кеткен. Жерине ыкчам түрдө «Чоң-Кемин» мамлекеттик жаратылыш паркынын егери Ж. Чокоев жана мергенчи У. Абыканов барышкан. Адистер зарыл болгон иш-чараларды жүргүзүп, жаныбарды жерге аман-эсен, коопсуз түшүрүүнү камсыздашты.

Ак илбирс — Кыргызстандын мамлекеттик символу. Анын калктуу конуштарга жакын жерде пайда болуу фактысы өлкөнүн биологиялык ар түрдүүлүгүн сактоо программасынын алкагында тармактык кызматтардын көзөмөлүндө турат.