Бишкек шаарында өтүп жаткан хоккей боюнча дүйнө чемпионатынын үчүнчү дивизионунун (В тайпасы) алкагында Кыргызстандын жаштар курама командасы (U-20) үчүнчү жеңишине жетти. Бул тууралуу Дене тарбия жана спорт агенттиги билдирди.

21-январда өткөн үчүнчү айлампанын алкагында Кыргызстандын курамасы Ирандын командасы менен беттешип, 15:1 эсебинде утуп алды. Үч айлампанын жыйынтыгы боюнча Кыргызстандын курама командасы 9 упай топтоп, турнирдик жадыбалда биринчи орунду ээледи.

Бүгүн, 22-январда саат 20:00дө Кыргызстандын курамасы Люксембургдун командасы менен беттешет.

Буга чейин улуттук курама Гонконгдун курама командасын 4:1 эсебинде, ал эми Түштүк Африканын командасын 7:2 эсебинде утуп алышкан.