Жогорку Кеңештин депутаттары Кыргызстан менен Монголиянын ортосундагы кылмышкерлерди өткөрүп берүү жөнүндө келишимди ратификациялоо тууралуу мыйзам долбоорун үчүнчү окууда кабыл алышты. Документке 2025-жылдын 21-июлунда Бишкек шаарында кол коюлган.

Келишим кылмыш жоопкерчилигине тартуу же соттун өкүмдөрүн аткаруу үчүн издөөдө жүргөн адамдарды экстрадициялоонун расмий укуктук механизмдерин белгилейт. Мыйзам күчүнө киргенден кийин, эки өлкө тең эл аралык укуктук кызматташтыктын алкагында соттолгондорду өткөрүп берүү жол-жоболорун расмий түрдө ишке ашыра алышат.

Бүгүнкү күндө Кыргызстандын түзөтүү мекемелеринде Монголиянын эки жараны жазасын өтөп жатат. Ал эми Монголиянын түрмөлөрүндө Кыргызстандын жарандары жок.

Монголиянын түрмөлөрүндө кыргызстандыктар жок болгонуна карабастан, монгол тараптан өз жарандарын экстрадициялоо боюнча суроо-талаптар түшүүдө. Ушуга байланыштуу эки мамлекеттин ортосунда камактагыларды алмашуу жана өткөрүп берүү маселелерин жөнгө салуучу укуктук базаны түзүү зарылдыгы келип чыккан.