Президент Садыр Жапаров инвестициялык ишмердүүлүк чөйрөсүндөгү мамлекеттик саясатты ишке ашыруунун натыйжалуулугун жогорулатуучу жана укуктук коллизияларды четтетүүчү «Кыргыз Республикасындагы инвестициялар жөнүндө» мыйзамга кол койду. Бул тууралуу мамлекет башчысынын аппаратынын маалыматтык камсыздоо бөлүмү билдирди.

Маалыматка ылайык, документ жагымдуу инвестициялык климатты түзүүгө, улуттук жана чет элдик инвестицияларды тартууга багытталган, ошондой эле инвесторлорду коргоо кепилдиктерин бекемдейт.

Алсак, инвестициялар мыйзамдарда түздөн-түз тыюу салынгандан башка бардык ишмердүүлүк түрлөрүнө жумшалышы мүмкүн.

Айрым долбоорлор үчүн турукташтыруу режими каралган. Тиешелүү келишим түзгөн инвестор жана инвестицияланган ишкана 10 жылдын ичинде салыктар жана салыктык эмес төлөмдөр боюнча эң ыңгайлуу шарттарды колдоно алышат.

Инвестицияларды коргоо кепилдиктери өзүнчө бекитилген. Мүлктү алып коюуга жана чыгымдардын ордун толтурууга соттун чечими менен гана жол берилет. Мүлктү конфискациялоо да соттун чечими менен гана жана кылмыш-жаза мыйзамдарында каралган учурларда гана мүмкүн болот.

Мыйзамдын жаңы редакциясына ылайык, инвестициялык талаш-тартыштар алгач сүйлөшүүлөр жолу менен жөнгө салынууга тийиш. Тараптардын макулдашуусу боюнча алар медиацияга же башка сотко чейинки жол-жоболорго берилиши мүмкүн.

Макулдашууга жетишилбеген учурда талаш-тартыштар Кыргызстандын сотторунда же арбитражда — тиешелүү макулдашуу болгондо же эл аралык келишимдердин алкагында каралат.

Мыйзам ошондой эле инвесторлордун даттанууларын кароо механизмин да камтыйт. Алар компетенттүү органдарга, анын ичинде ыйгарым укуктуу мамлекеттик органга берилиши мүмкүн, мында даттануулардын реестри жүргүзүлөт.

Мындан тышкары, документ инвестициялык келишимдерди түзүү тартибин, анын ичинде артыкчылыктуу тармактардагы долбоорлор боюнча Министрлер кабинети менен түз сүйлөшүүлөрдү жүргүзүү аркылуу жөнгө салат.

Мындай келишимдер Президентке караштуу Инвестициялар боюнча улуттук агенттик менен макулдашылууга тийиш, ал борборлоштурулган реестрди жүргүзөт. Чет элдик инвесторлор ошондой эле ыктыярдуу аккредитациядан өтө алышат. Аны өткөрүү тартибин жана критерийлерин Министрлер кабинети аныктайт, ага алты айлык мөөнөттө зарыл болгон мыйзам алдындагы актыларды кабыл алуу тапшырылды.

Мыйзам расмий жарыяланган күндөн тартып 15 күн өткөндөн кийин күчүнө кирет.