Кыргызстандын мектептеринде тамак-аштын кымбатташына байланыштуу башталгыч класстын окуучуларына ысык тамак берилбей калды. Бул тууралуу бүгүн, 21-февралда Жогорку Кеңештин Социалдык саясат боюнча комитетинде билим берүү жана илим министринин орун басары Надира Жусупбекова билдирди.
Анын айтымында, бир окуучунун тамак-ашына бюджеттен бөлүнгөн 7 сом аздык кылат. Андыктан аталган мекеме Каржы министрлигинен бул сумманы 14 сомго, алыскы аймактардагы мектептерге 20 сомго чейин көтөрүүнү суранат, азыр тамак-ашка 10 сомдон бөлүнөт.
Балдардын тамак-ашына 7 жана 10 сомдон бөлүнөрү депутаттарды таң калтырды.
Айгүл Айдарова аткаминерлердин арасында окуучулар үчүн даярдалган 7 сомдук тамак-ашты жеген жокпу деп сурады.
Жусупбекова Билим берүү министрлигинин кызматкерлери 7 сомдук тамакты даамдап көрүп, даамдуу болгонун айтты.
«Бирок азыр бул каражат жетишсиз. Ошондуктан ысык тамактан баш тартып, балдарга булочка жана компот эле берүүгө туура келип жатат», — деди министрдин орун басары.
