Саламаттык сактоо министрлиги жаңы Улуттук вакцина кампасынын курулушу башталганын расмий жарыялады. Бул объект препараттарды ишенимдүү сактоону жана өлкөнүн бардык аймактарына үзгүлтүксүз жеткирүүнү камсыз кылуу менен өлкөнүн саламаттык сактоо коопсуздугунун тутумундагы негизги звено болуп калат.

1-апрелде Ахунбаев көчөсү, 186 дарегиндеги курулуш аянтчасында Саламаттык сактоо министрлигинин жетекчилигинин, Республикалык иммунопрофилактика борборунун жана эл аралык өнөктөштөрдүн (ЮНИСЕФ, ГАВИ) жумушчу жолугушуусу өттү. Катышуучулар иш графигин жана объектке коюлган техникалык талаптарды талкуулашты. 13 сотых аянтты түзгөн жер тилкеси буга чейин борбордун балансына өткөрүлүп берилген.

Курулуштун зарылдыгын Дүйнөлүк саламаттык сактоо уюмунун (ДСУ) эксперттери тастыкташкан. Өткөрүлгөн текшерүү көрсөткөндөй, эски инфратүзүм мындан ары эл аралык стандарттарга жооп бербейт жана иммундаштыруу программасынын өсүп жаткан муктаждыктарын канааттандыра албайт. Жаңы кампа сактоо көлөмүн кыйла көбөйтүүгө жана кымбат баалуу препараттарды жоготуу тобокелдиктерин четтетүүгө мүмкүндүк берет.

Долбоор Вакциналар жана иммундаштыруу боюнча глобалдык альянстын (ГАВИ) колдоосу менен ишке ашырылууда, ал бул максаттарга 1 миллион 267 миң АКШ долларын бөлдү. Техникалык тарабын — долбоордун негиздемесинен тартып сметаны түзүүгө чейин — ЮНИСЕФ даярдады.

Болочок кампа төмөнкүлөр менен жабдылат:

• температуралык режимди көзөмөлдөөчү заманбап тутумдар;
• реалдуу убакыт режиминдеги автоматташтырылган мониторинг;
• электр менен камсыздоонун резервдик булактары;
• запастарды башкаруу үчүн санариптик инструменттер.

Саламаттык сактоо министринин орун басары, Башкы мамлекеттик санитардык дарыгер Гүлбара Ишенапыса бул долбоордун ишке ашырылышы бүтүндөй иммундаштыруу тутумунун туруктуулугу үчүн стратегиялык мааниге ээ экенин баса белгиледи. Республикалык иммунопрофилактика борборунун директорунун милдетин аткаруучу Гүлнара Жумагулованын айтымында, бул вакциналарды өлкө боюнча максималдуу ыкчамдык менен бөлүштүрүүгө шарт түзөт.