Бишкекте ИИМдин Күзөт кызматынын кызматкерлери өз жанын кыюуга аракет кылган жарандын өмүрүн сактап калышты. Бул тууралуу Күзөт кызматынын басма сөз кызматы билдирди.
19-августта саат 22:14тө милицияга Тыныстанов көчөсүндөгү көп кабаттуу үйдүн балконунан аял секиргени жатканы тууралуу маалымат түшкөн.
Жерине күзөт кызматкерлери Медер Усманов, Нуржигит Базарбай уулу жана Тынчтык Эрназаров барып, аялдын өз өмүрүнө кол салуу аракетин алдын алып калышкан.
Куткарылган аял Бишкектин 33 жаштагы тургуну болот. Анын туугандары милиция кызматкерлерине ыраазычылыктарын билдиришкен.
