Бишкекте өспүрүм баланы уурдап кетип, сабоого шектүү жарандар кармалды. Бул тууралуу Ленин райондук милициясынан билдиришти.
Маалыматка караганда, милицияга аял киши кайрылып, 3-сентябрга караган түнү Садырбаев менен Валдайский көчөлөрүнүн кесилишинен белгисиз адамдар өспүрүм баласын күч менен унаага отургузуп, белгисиз жакка алып кетип, сабаганын билдирген.
Аталган фактыга байланыштуу Кылмыш-жаза кодексинин 165-беренеси (адам уурдоо) боюнча кылмыш иши козголгон.
Ыкчам-тергөө иштеринин натыйжасында шектүү катары 19 жаштагы Э.Э., Т.Д., Б.К, Н.О., 23 жаштагы М.Б. жана 18 жаштагы К.Н. аттуу 6 жаш жигит кармалган. Алар Ленин райондук милициясынын тергөө кызматына жеткирилип, андан кийин убактылуу кармоочу жайга камакка алынган.
Учурда иликтөө иштери уланууда.
Биздин Телеграм каналга катталыңыз
