Кемпир-Абад иши боюнча камакта отургандар 19-майдан тарта ачкачылык жарыялады. Бул тууралуу алардын акыйкатчы жана Кыйноолорду алдын алуу борборуна жолдогон катында айтылат.
Кайрылууда «кемпир-абадчылар» билдиргендей, алар 7 айдан бери мыйзамсыз камакта отурат.
«2022-жылдын декабрь айында бардык кемпир-абадчыларды мурдагы абак бөлмөлөрүнөн башка абак бөлмөлөрүнө которушкан. Эми 15-майда Равшан Жээнбековду, 17-майда Илгиз Шаменовду дагы башка абак бөлмөлөрүнө эч негизсиз которушту. Ал эми Атай Бейшенбек уулун 18-майда 3 күнгө айып бөлмөсүнө камашты.
Биз бул аракеттерди өз оюбузду ачык билдиргенибиз үчүн бизге жүргүзүлгөн моралдык-психологиялык басым жана саясий куугунтуктун ыплас жолу деп эсептейбиз», — деп айтылат кайрылууда.
Саясий куугунтук болуп жатканын айткан «кемпир-абадчылар» каршылык иретинде 19-майдан баштап саясий ачкачылык жарыялаганын билдирди.
Алар эки талап койгон:
1) Кемпир-абадчыларга болуп жаткан моралдык-психологиялык басым токтотулсун.
2) Равшан Жээнбеков, Илгиз Шаменов, Атай Бейшенбек уулу мурдагы отурган абак бөлмөлөрүнө кайтарылсын жана улам-улам абак бөлмөлөрүнө которуулар токтотулсун.
Эскерте кетсек, 2022-жылы 22-октябрда Кемпир-Абад суу сактагычын коргоо комитети түзүлгөн. Анын курамына активисттер, саясатчылар жана депутаттар кирген. 23-октябрда массалык тинтүү иштери башталып, 20дан ашык адам кармалып, алар 48 саатка камалган.
24-октябрда Бишкек шаарында Кемпир-Абад суу сактагычынын астындагы жердин Өзбекстанга берилишине жана активист, саясатчылардын камалышына каршы жөө жүрүш өткөн. 25-октябрда Биринчи май райондук соту тарабынан алар эки айга камакка алынган.
Активист жана саясатчылардын камалышы боюнча ИИМ түшүндүрмө берип, Кылмыш-жаза кодексинин 36-278-беренеси «Массалык баш аламандыктарды уюштурууга даярдануу» менен козголгон кылмыш иши боюнча тергөө амалдары жүргүзүлүп жатканын билдирген.
Учурда 15 бул иш боюнча 15 киши камакта отурат.
Биздин Телеграм каналга катталыңыз
