Кыргызстанда мас абалында унаа башкарууга карата жаза катаалдаштырылды — тиешелүү мыйзамга мамлекет башчысы кол койду.

Эми мас абалында унаа башкаргандар 12 жылга чейин айдоочулук күбөлүгүнөн ажыратылат, ал эми административдик камактын мөөнөтү 20 суткага чейин узартылды (мурда — 7 суткага чейин болчу). Эгерде мас айдоочунун айынан жол кырсыгы катталып, андан адамдар жабыркаса, 5 жылдан 7 жылга чейин эркинен ажыратуу жазасы каралат. Ал эми жол кырсыгы адам өлүмүнө алып келсе, айдоочу 10-12 жылга чейин эркинен ажыратылат.

Ошондой эле, ушул эле мыйзам менен мопед жана электроскутерлерди милдеттүү түрдө каттоо талабы киргизилди — эми алардын ээлери «А1» категориясындагы айдоочулук күбөлүктү алууга милдеттүү болушат.