Кыргызстандын Көк бөрү федерациясынын президенти болуп Рамис Жунусалиев шайланды. Бул тууралуу чечим уюмдун жыйынында кабыл алынды.
Рамис Жунусалиев «Сары-Өзөн» командасынын жетекчиси, федерациянын вице-президентинин милдетин аткарып келген.
Федерацияны эки жыл башкарган Талас Бегалиев өз калоосу менен ордун тапшырып берди.
Эскерте кетсек, 31-августта Ош облусунда көк бөрүнүн жогорку лигасынын финалында «Достук» жана «Ынтымак» командалары ойноп, «Ынтымак» 2:1 эсебинде жеңишке жеткен. Оюндан кийин калыстардын ишине нааразы болгон күйөрмандар тополоң чыгарган.
Бул окуядан кийин облустук милиция билдиргендей бейбаштык жасаган делип ондогон адам кармалып, милицияга жеткирилген. Алардын ичинен 5 адамга Кылмыш-жаза кодексинин 280-беренеси (бейбаштык) боюнча кылмыш иши козголгону кабарланган. Дагы 27 кишиге Укук бузуулар кодексинин 126-берене (майда бейбаштык) боюнча протоколдор түзүлгөнү айтылган.
Биздин Телеграм каналга катталыңыз
