Кыргызстандын Конституциялык сотуна өлүм жазасын киргизүү каралган мыйзам долбоору боюнча расмий корутунду берүү өтүнүчү менен президенттин сунуштамасы келип түштү. Сөз Конституциянын 25-беренесинин 1-бөлүгүнө өзгөртүү киргизүү тууралуу демилге жөнүндө болууда.

Долбоордо өлүм жазасын сексуалдык мүнөздөгү өзгөчө оор кылмыштар үчүн, анын ичинде балдарга карата зордук-зомбулук фактылары жана зордуктоо менен коштолгон адам өлтүрүү кылмыштары үчүн өзгөчө жаза чарасы катары караштыруу сунушталууда.

Түшүндүрмө материалдарда бул демилге балдарга жана аялдарга карата өзгөчө оор кылмыштардын өсүп жатканы менен байланыштуу экени баса белгиленген. Түзөтүүнүн максаты — алардын конституциялык-укуктук корголушун күчөтүү.

Эгер өзгөртүүлөр кабыл алынса, Кыргызстанга жүктөлгөн эл аралык милдеттенмелерге байланышкан маселелер өзүнчө укуктук жана зарыл процедуралардын алкагында жөнгө салынары айтылат.

Президент мыйзам долбоорун расмий корутунду алуу үчүн Конституциялык сотко жөнөткөн.

Эске салсак, 17 жаштагы кыздын мыкаачылык менен өлтүрүлүшү өлкөдө чоң талкууну жаратып, бийликти өлүм жазасын кайтаруу маселесин көтөрүүгө мажбур кылган. Президент Садыр Жапаров Кыргызстанда 16 жыл мурун жоюлган өлүм жазасын кайтаруу мүмкүнчүлүгүн караган, кылмыш-жаза мыйзамдарын жана укуктук тутумду өзгөртүшү мүмкүн болгон түзөтүүлөрдү даярдоону тапшырган.