Москва шаарында «Кыз-жигит Сармерден» музыкалык маданият жана каада-салттарынын фольклордук фестиваль-сынагы өткөрүлдү. Бул тууралуу Тышкы иштер министрлиги билдирди.
Ал Кара-Кыргыз автономиялуу облусунун түзүлгөндүгүнүн 100 жылдыгына жана Эгемендүүлүк күнүнө арналды. Анда Москвадагы кыргыз диаспора уюмдарынын өкүлдөрү өз таланттарын көрсөтүштү.
Программада “Манас” эпосунан үзүндүлөр айтылып, Мекенге, эли-жерине болгон сүйүүнү даңазалаган кыргыз элдик ырлары аткарылып, кыргыздын улуттук каада-салттары, үрп-адаттары чагылдырылган көрүнүштөр көрсөтүлдү.
Активдүү катышуучулар Орусиядагы элчиликтин ыраазычылык каттары менен сыйланышты.
