Абдрахманов жана Киев көчөлөрүнүн кесилишинде жайгашкан көпчүлүк бишкектиктерге белгилүү болгон “Евразия” коомдук тамактануу түйүнү кайрадан ишин башташы мүмкүн. Муниципалитет 2023-жылдын апрель айында ал жерди бузуп, соода түйүнүнүн ээси болгон «Алто» ЖЧКсы менен келишимди бузган. Келишим мыйзамсыз деп табылды.

Киев көчөсүндөгү 49-үйдүн жашоочусу Жанна Палванованын айтымында, өткөн жылы «Альто» ЖЧКсы ошол эле жердеги коомдук тамактануучу жайды кайра ачуу схемасын ойлоп тапкан: үйдүн жашоочуларынын курамына өз адамдарын киргизип, бул үйдө батирдин ээси эмес, ижарада турган аялдын жетекчилиги менен жаңы ТСЖ түзүшкөн. Ошентип, алар коомдук ашкана курууга уруксат алышкан.

«Жыйындар ачык өткөрүлбөй, протоколдордо батирлердин ээси болуп эсептелбеген адамдар көрсөтүлгөн. Көптөгөн арыз-даттанууларга карабастан, Юстиция министрлиги жана Чүй-Бишкек юстиция башкармалыгы мыйзам бузууларды жоюп эле тим болбостон, ТСЖны каттоо буйругу менен мыйзамдаштырган. Ишке Кыргыз Республикасынын Юстиция министринин биринчи орун басары, ошол даректеги үйдүн тургуну Зарылбек Алмазбек уулу аралашкан», – деп белгиледи Палванова.

Кошумчалай кетсек, тургундар «Альто» ЖЧКсынын жетекчилигинде борбор калаанын Биринчи май акимчилигинин башчысынын жардамы менен мыйзамсыз курулушка уруксат алган таасирдүү адамдар бар экенин айтышууда.

Бишкектин тургундары өлкө президенти Садыр Жапаровдон алардын көйгөйүнө көңүл буруп, мыйзамсыз курулуштар менен күрөшүүгө көмөктөшүүнү, ошондой эле алардын ордуна чектеш аймактарды көрктөндүрүү иштерин уюштурууну суранышууда.

Өз кезегинде борбор калаанын мэриясынын басма сөз кызматы Reporter.kgге түшүндүргөндөй, «Бишкекбашкыархитектура» муниципалдык ишканасынын объектинин 2025-жылдын 20-июнундагы паспортуна ылайык «Киев көчөсүндөгү 49-көп кабаттуу үйгө соода жайларын куруу» долбоору бекитилип, техникалык экспертизанын корутундусу бекитилип, техникалык чечими бар.

Мындан тышкары, объектти арестке алуу чарасы көрүлбөй, тургундардын ТСЖнын жыйынын жана ижара келишимин жараксыз деп таануу боюнча доо арыздары четке кагылган.