Таласта тобунан адашып, жерге кулап түшкөн бирказан кушу табылды. Бул тууралуу Экология министрлигинин Таластагы башкармалыгынын башчысы Бекмырза Ашымов билдирди.

Анын айтымында, Туратбек Базарбаев аттуу тургун Орто-Кошой тилкесинде уча албай, суу жээктеп жүргөн бирказан кушун таап алган. Кабар берилгенден кийин алар жерине дароо барышкан. Ветеринарлар кушту карап чыгып, жаракаттары бар экенин көрүшкөн.

Ашымов белгилегендей, алардын божомолу боюнча бирказан жылуу жакка учуп баратып, тобунан адашып кетип, жерге кулаган. Жерге түшкөндө катуу урунгандыктан, ички органдары жабыркаган.

Министрлик 7-октябрда кушту Чүйдөгү “Бугу Эне” реабилитациялык борборуна өткөрүп беришкен. Ал жактан кушка жылуу уя жасалып, аталган борбордун камкордугуна алынган.