Бүгүн, 6-июнда Жалал-Абад ОИИБдин имаратында бир катар кызматкерлерге атайын наамдар, медаль жана ардак грамоталар тапшырылды, деп билдирет облустук милициянын басма сөз кызматы.
Маалыматка караганда, ИИМдин буйругу менен Жалал-Абад ОИИБдин маалыматтык технологиялар бөлүмүнүн начальниги Алишер Абдуллаевге милициянын полковниги наамы ыйгарылды.
Жалал-Абад ОИИБдин басма сөз кызматынын улук инспектору милициянын подполковниги Нурдинбек Жээнтаевге спортто жетишкен ийгиликтери үчүн кыргыз дене тарбия спорттук “Динамо” коомдук бирикмесинин “90 жыл” медалы тапшырылды.
Ошондой эле өздөрүнүн кызматтык милдеттерине карата жоопкерчиликтүү мамиле кылгандыктары, кылмыштуулукка каршы күрөшүүдө, коомдук коопсуздукту сактоодо кошкон зор салымдары үчүн Жалал-Абад ОИИБдин Криминалистикалык кызматынын бир катар кызматкерлери ардак грамоталар менен сыйланышты.
