Кыргызстандан Өзбекстанга 6 тонна дизелдик отун мыйзамсыз ташылып бара жатканы аныкталды. Бул тууралуу УКМКнын Чек ара кызматынан билдиришти.
Маалыматка караганда, 2023-жылдын 28-мартында «Чечме-автодорожный» өткөрүү пунктунун чек арачылары Мамлекеттик бажы кызматынын аймактык бөлүмүнүн кызматкерлери менен биргеликте КР Каржы министрлиги тарабынан күйүүчү-майлоочу майларды мыйзамсыз алып өтүүгө аракет кылган Өзбекстандын жараны кармалды.
Өткөрүү пунктуна Кыргызстандан Өзбекстанга Сох анклавын көздөй бара жаткан 1996-жылы туулган Өзбекстан жараны М.А.А.у.нын башкаруусундагы КАМАЗ (май ташуучу) унаасы келип түшкөн.
Күйүүчү май ташуучу унаанын цистернасын текшерүү учурунда чек арачылар жана бажычылар цистернанын чоңураак бөлүгүнөн 6 тонна дизель майын табышкан, бирок коштоочу документтерде цистернанын кичинекей бөлүгүндө АИ-80 үлгүсүндөгү бензин гана көрсөтүлгөн.
Тийиштүү документтер толтурулгандан кийин кармалган айдоочу жана контрабандалык жүк кошумча иликтөө үчүн компетенттүү органдардын кызматкерлерине өткөрүлүп берилди.
Биздин Телеграм каналга катталыңыз
