Орусияда кыргыз таксистке карата кылмыш иши токтотулду. Бул тууралуу Тышкы иштер министрлиги билдирди.
Мекеме кыргыз жараны Айыпбек Латиповго консулдук-укуктук жардам көрсөтүлгөнүн белгилейт. Андан тышкары, Орусиянын ТИМине кылмыш ишин объективдүү жана ар тараптуу кароо өтүнүчү менен расмий Нота жөнөтүлгөн.
«Учурда кылмыш курамынын жоктугуна байланыштуу токтотулган», — дейт министрлик.
Белгилей кетсек, 24 жаштагы Айыпбек Латипов Украинадан согушка катышып келген 3 кишини таксиден түшүрүп, жеткирбей койгондугу боюнча видео социалдык тармакка жарыялангандан кийин 3-июнда кармалып, кайра бошотулган. Ага каршы кастыкты козутуу айыбы менен иш козголгону айтылган.
Кыргыз жаранынын айтымында, жүргүнчүлөр аны коркутуп, кол көтөрүп, жакынкы токойго карай айдатууга аракет кылышкандыктан ал унаасын токтотуп жардам чакырып, эч ким токтобогондуктан окуя болгон жерден кетип калууга аракетин көргөн.
Латиповдун жактоочусу орус медиасына берген маалыматында, таксинин жүргүнчүлөрүнүн аракетине юридикадык баа берилиши керектигин айткан.
