Бишкек шаарында 30 жаштагы жаран вебкам-студияларды уюштурууга шектелип кармалды. Бул тууралуу ИИМ кабарлады.
Маалыматта айтылгандай, 11-мартта Бишкек шаардык милициясына интернет сайттарындагы жарнама аркылуу кыздарды жогорку акы төлөнүүчү онлайн-видео маек куруу кызматтарын көрсөтүүгө, башкача айтканда, вебкам-студияларына жумушка чакыруу жүрүп жатканы тууралуу маалымат түшкөн.
Аталган факты боюнча Кылмыш-жаза кодексинин 160-беренеси (сойкулукка тартуу) менен кылмыш иши козголгон.
Ыкчам тергөөнүн жыйынтыгында, шектүү катары 1995-жылы туулган Т.А. атуу жаран кармалган. Ал убактылуу кармоочу жайга киргизилген.
Учурда тергөө жүрүп жатат.
