19-июндан тарта Бишкек-Балыкчы багыты боюнча жүргүнчү поезди бейшемби, ал эми 23-июндан баштап дүйшөмбү күндөрү да каттай баштайт. Бул тууралуу «Кыргыз темир жолу» ишканасы билдирди.
Маалыматка ылайык, эми поезд 19-июндан 7-июлга чейин дүйшөмбү, бейшемби, жума, ишемби жана жекшемби күндөрү каттайт.
Ал эми 7-июлдан 31-августка чейин поезд күн сайын жүрөт. Бул багытта жалпы 15 вагон каттамга чыга баштайт.
Ишкана мындай чечим жайкы сезон учурунда жүргүнчүлөрдүн кайрылууларын жана өскөн суроо-талапты эске алуу менен кабыл алынганын билдирди.
Эске салсак, буга чейин поезд жума, ишемби жана жекшемби күндөрү каттап келген.
