Өзбекстандын президенти Шавкат Мирзиёев Жакынкы Чыгыштагы жаңжалдын курчушу Борбордук Азияга, биринчи кезекте соода-сатык байланыштарына жана логистикага терс таасирин тийгизерин билдирди. Бул тууралуу ал видеоселектордук кеңешменин жүрүшүндө айтты.
Өзбек лидеринин айтымында, кырдаалдын мүмкүн болгон курчушу коронавирус пандемиясынан кийин жаңыдан гана калыбына келе баштаган соода жана логистикалык жолдорго кыйынчылыктарды жаратат.
«Дүйнөдө Жакынкы Чыгышка гана эмес, биздин аймакка да таасирин тийгизе турган кезектеги жаңжал очогу тутанганы – бул факт», — деп баса белгиледи Мирзиёев.
Буга байланыштуу мамлекет башчысы жергиликтүү администрация жетекчилерин (акимдерди) жана министрлерди жогорудан көрсөтмө күтпөстөн, өз аймагындагы мүмкүнчүлүктөрдү жана коркунучтарды алдын ала көрө билип, аларды алдын алуу үчүн проактивдүү аракеттенип, иштеринде демилге көтөрүүгө чакырды.
