10-августта Чүй облусунун Панфилов районунун Орто-Арык айылындагы тоодон чыккан өрттү өчүрүү иштери кеч киргенине жана тоонун боорунан таштардын кулап, кооптуу абал түзүлгөнүнө байланыштуу саат 21:45те токтотулду.

ӨКМдин маалыматына ылайык, өрттү ооздуктоо иштери министр Бообек Ажикеевдин жеке көзөмөлүндө 9-августтан бери жүрүп жатат.

Учурда жеринде Мамлекеттик аңчылык чарбасынын 4 кызматкери жана айыл аймактан 2 кызматкер нөөмөттө калды. Өрттүн болжолдуу аянты 100 гектарды түзүүдө.

Бүгүн, 11-августта өрттү өчүрүү иштери улантылат. Бүгүнкү күндө Чүй облусу боюнча ӨКМ башкармалыгынын башчысынын орун басары полковник Ч. Боскунчиевдин жетекчилигинде 46 адамдан турган ыкчам топ тартылган.