Кыргызстан миграциялык кызматтарды санариптештирүүгө кезектеги кадамын таштады. Республикада «Санарип көчмөн» (Digital Nomad) макамын алууну каалаган чет элдик жарандар үчүн электрондук платформа расмий иштей баштады. Эми өтүнүчтү баштапкы этапта мамлекеттик органдарга барбастан, аралыктан берүүгө болот. Бул тууралуу Эмгек министрлигинин басма сөз кызматы билдирди.

Онлайн-сервис dnomad.e-gov.kg дареги боюнча жеткиликтүү.

Бул кантип иштейт?

Табыштама берүү жараяны эки баскычка бөлүнгөн:

1. Каттоо: Чет элдик жаран платформада жеке кабинетин активдештирүү үчүн табыштама жөнөтүшү керек.
2. Документтерди тапшыруу: Кабинет активдештирилгенден кийин гана макам алууга арыздын формасы ачылат.

Маанилүү: Арыз тиешелүү документтердин толук топтому болгондо гана кароого алынат.

Макам ыйгаруунун баскычтуу тутуму киргизилди:

• Биринчи этап: Макам 60 күнгө берилет.
• Экинчи этап: 1 жылдык мөөнөткө узартуу.
• Келечекте: Жыл сайын узартуу менен 10 жылга чейин.

«Санарип көчмөн» макамы чет элдик адистерге (негизинен IT, медиа жана креативдүү индустрия тармагындагыларга) чет өлкөлүк компанияларда аралыктан иштөө шарты менен виза же иштөөгө уруксат албастан Кыргызстанда мыйзамдуу жашап жана иштөөгө мүмкүндүк берет.

Документтердин толук тизмеси жана нускамалар менен платформанын сайтынан таанышууга болот. Кеңеш алуу үчүн түз байланыш телефону ишке киргизилди: +996 (312) 66-39-64.