«Ынтымак Ордо» мамлекеттик резиденциясында Министрлер кабинетинин төрагасынын орун басары Бакыт Төрөбаевдин төрагалыгы алдында 2025–2026-жылдардын жылытуу мезгилинен өтүү маселелери боюнча жумушчу кеңешме болуп өттү. Жыйында Токтогул суу сактагычындагы суунун деңгээлинин төмөндөшү жана электр энергиясын керектөөнүн өсүшү тууралуу маалыматтар айтылды.

Энергетика министрлигинин баяндамасына ылайык, Кыргызстанда электр энергиясын керектөө өсүүдө: 2025-жылы ал 19,3 млрд кВт·саатка жетти, бул мурунку жылга салыштырмалуу 900 млн кВт·саатка көп. Ал эми ички өндүрүш 15,4 млрд кВт·саатты түзүп, 3,9 млрд кВт·саат өлчөмүндөгү таңсыктык импорттун эсебинен жабылган.

Кырдаал бүтүндөй Борбор Азия чөлкөмүндө байкалып жаткан суунун аздыгынан улам татаалдашууда. Бүгүнкү күндө Токтогул суу сактагычындагы суунун көлөмү 9,102 млрд куб метрди түзөт, бул өткөн жылдын ушул мезгилине салыштырмалуу 1,631 млрд куб метрге аз. Адистер суунун жетишсиздиги электр энергиясын иштеп чыгуунун мындан ары да төмөндөшүнө алып келиши мүмкүн экенин эскертүүдө. Бакыт Төрөбаев керектөө лимиттерин так сактоо зарылдыгын белгилеп, учурдагы талдоо белгиленген ченемдер дайыма бузулуп жатканын көрсөткөнүн айтты.

Энергетика секторундагы кыйынчылыктарга карабастан, катуу отун менен камсыздоо жаатындагы абал туруктуу деп бааланууда. Кышкы мезгилден өтүү үчүн республикага 3,1 млн тоннадан ашык көмүр керектелет, анын запасы жетиштүү көлөмдө топтолгон. Бишкек жана Ош шаарларынын ЖЭБдеринде да көмүр менен мазуттун зарыл болгон резерви бар.

Саламаттыкты сактоо, билим берүү жана социалдык өнүктүрүү министрликтери учурда социалдык мекемелерде жылытуу мезгили олуттуу үзгүлтүксүз өтүп жатканын маалымдашты.

Кеңешменин жыйынтыгы менен Бакыт Төрөбаев бардык мамлекеттик жана муниципалдык органдардын жетекчилерине иштөөнүн күчөтүлгөн тартибине өтүүнү тапшырды. Негизги милдеттер катары төмөнкүлөр аныкталды:

• калкты жана социалдык объекттерди жылуулук жана электр энергиясы менен үзгүлтүксүз камсыздоо;
• энергияны керектөө лимиттеринин сакталышын катуу көзөмөлдөө;
• ыкчам кызматтардын аба ырайынын кескин өзгөрүшүнө карата толук даярдыгы.

Министрлер кабинетинин төрагасынын орун басары суу тартыш шартта туруктуу энергия менен камсыздоо ресурстарды максималдуу мобилизациялоону жана жер-жерлердеги жетекчилердин жоопкерчилигин талап кыларын баса белгиледи.