Алдамчылыкка айыпталган жаран Грузияда кармалып, Кыргызстанга алынып келинди. Бул тууралуу Башкы прокуратура билдирди.

Тергөөнүн маалыматына ылайык, кармалган жаран автоунааны сатып алуу-сатуу келишимин түзүү шылтоосу менен жабырлануучуну алдап, акчасын ээлеп алууга айыпталган. Бирок ал жаза жоопкерчилигинен качуу үчүн өлкөдөн чыгып кеткен.

Экстрадициялоо Башкы прокуратура менен Грузиянын тиешелүү органдарынын кызматташуусунун негизинде аткарылган. Айыпталуучу Ички иштер министрлигинин кызматкерлеринин коштоосунда алынып келинип, тергөө абагына киргизилген.

Башкы прокуратура кылмыш жоопкерчилигинен качып, чет өлкөлөрдө жүргөн адамдарды издөө жана экстрадициялоо иштерин улантып жатканын кошумчалады.