2025-жылдын 1-ноябрынан 2026-жылдын 1-ноябрына чейин 304,9 миң жаран өз атына кредит жана насыя тариздөөгө ыктыярдуу түрдө тыюу салуу мүмкүнчүлүгүн колдонгон. Кыргызстанда өзүнө-өзү тыюу салуу механизми бир жылдан бери иштеп келет.

2026-жылдын 1-ноябрына карата 200,1 миң адамда тыюу күчүндө болгон.

Өзүнө-өзү тыюу салуу — финансылык-кредиттик уюмдарда өз атына кредит жана насыя тариздөөнү алдын ала чектөөгө мүмкүндүк берген акысыз жана ыктыярдуу кызмат. Ал адамдын кабары жок туруп анын атына кредит таризделүү коркунучун азайтуу үчүн киргизилген.

Тыюу салууну «Түндүк» тиркемеси аркылуу орнотууга болот. Ал үчүн «Кредит алууга өзүнө-өзү тыюу салуу» функциясын иштетип, кредиттик бюрону тандап, өтүнмө жөнөтүү керек. Тыюу дароо күчүнө кирет. Чектөөнү өтүнмө берилгенден 12 саат өткөндөн кийин алып салууга болот. Эгер кызмат эки кредиттик бюродо тең кошулган болсо, тыюуну ар биринен өзүнчө алып салуу зарыл.