Кыргызстандын президенти Садыр Жапаров 30-октябрда Анкарага болгон жумушчу сапарынын алкагында Түркиянын лидери Режеп Тайып Эрдоган менен сүйлөшүүлөрдү жүргүздү.

Мамлекет башчылары эки тараптуу кызматташтыктын актуалдуу маселелерин жана кыргыз-түрк мамилелерин мындан ары өнүктүрүүнүн келечегин талкуулашты.

Жапаров түрк тарапка жылуу кабыл алгандыгы жана Түрк мамлекеттер уюмунун саммитин жогорку деңгээлде уюштургандыгы үчүн ыраазычылык билдирип, ошондой эле Түркия элин Республика күнү менен куттуктады.

Кыргызстандын президенти өлкөнүн Түркия менен ар тараптуу стратегиялык өнөктөштүктү мындан ары бекемдөөгө кызыкдар экенин баса белгиледи. Тараптар эң жогорку деңгээлдеги саясий диалогдун маанилүүлүгүн жана ар түрдүү тармактарда кызматташтыкты кеңейтүү мүмкүнчүлүктөрүн белгилешти.

Жолугушуунун жыйынтыгында Жапаров жетишилген макулдашуулар кыргыз-түрк мамилелерин андан ары чыңдоого өбөлгө түзөрүнө ишеним билдирди.