Жогорку Кеңештин жыйынында депутат Дастан Бекешев мектеп формасына коюлган талаптарды кайра карап чыгуу сунушун Министрлер кабинетине билдирди.

Анын айтымында, буга чейин Агартуу министрлигинин алдында бул маселе боюнча атайын комиссия түзүлгөн. Бирок, депутат белгилегендей, комиссия иштебей, маселе чечилбей келет.

Парламентарийдин пикиринде, мектеп формасы ысыкта да, суукта да ыңгайсыздык жаратат.

«Кыздардын фартук, кыска юбка кийиши милдеттүү эмес. Джинсы менен да барса болот. Суранам, бул маселеге адамгерчилик менен мамиле жасап, олуттуу деңгээлде карап чыгалы», — деди ал президенттин жана Министрлер кабинетинин Жогорку Кеңештеги өкүлү Бектур Зулпиевге кайрылып.