КР макулатураны сыртка ташып чыгууга чектөөлөрдү дагы жарым жылга узартууну көздөшүүдө

16.11.2026 | 11:52
КР макулатураны сыртка ташып чыгууга чектөөлөрдү дагы жарым жылга узартууну көздөшүүдө — Новости Кыргызстана

Кыргызстанда макулатураны Евразия экономикалык биримдигинин (ЕАЭБ) аймагынан тышкары ташып чыгууну дагы алты айга чектөө сунушталууда. Буга кагаз продукциясын чыгарган ата мекендик ишканалар үчүн чийки заттын жетишсиздиги себеп болууда. Министрлер кабинетинин тиешелүү токтомунун долбоорун Экономика жана коммерция министрлиги иштеп чыкты.

Негиздеме-маалымкатта белгиленгендей, мындай чаралар Кыргызстанда жергиликтүү кайра иштетүүчүлөрдү колдоо максатында 2021-жылдан бери киргизилип келет. Бирок айрым компаниялар дагы деле толук кубаттуулукта иштей албай жатат.

Атап айтканда, «Алтын-Ажыдаар» жана «Кош Тамчы» ишканалары кубаттуулуктары жарым-жартылай гана жүктөлгөнүн билдиришти.

Экономика министрлиги кырдаал мындан ары да начарласа, продукция чыгаруу көлөмүнүн кыскарышына, ишканалардын жабылышына жана жумуш орундарынын жоголушуна алып келиши мүмкүн экенин эскертүүдө. Мындай учурда мамлекеттик бюджет да салыктык түшүүлөрдү толук албай калат.

Ошол эле учурда кагаз продукциясына болгон суроо-талап өсүүдө. Негиздеме-маалымкатта келтирилген маалыматтарга ылайык, 2020-жылы Кыргызстанда 1 665,1 тонна даарат кагазы чыгарылса, 2024-жылы 4 002,4 тонна өндүрүлгөн. 2026-жылдын тогуз айында бул көрсөткүч 3 757,3 тоннаны түздү.

Кагаз тарасын чыгаруу да көбөйдү: 2020-жылдагы 10,3 млн чарчы метрден 2025-жылы 25 миллионго чейин өстү.

Министрлик чектөөлөрдү узартуу жумуш орундарын сактап калууга, ата мекендик ишканаларды колдоого жана даяр продукциянын экспортун көбөйтүүгө мүмкүндүк берет деп эсептейт.

Эмнени өзгөртүү сунушталууда

Токтомдун долбоорунда макулатураны, кагаз жана картон калдыктарын ЕАЭБдин бажы аймагынан тышкары ташып чыгууга алты айлык тыюу салуу каралган. Чектөө транзиттик ташууларга жана Кыргызстандын Министрлер кабинети тарабынан көрсөтүлүүчү гуманитардык жардамга жайылтылбайт.

Документке ылайык, токтом расмий жарыялангандан жети күндөн кийин күчүнө кирет, ал эми жаңы эрежелер дагы үч күндөн кийин иштей баштайт.

Экономика министрлиги кабыл алынган чечим тууралуу Дүйнөлүк соода уюмуна жана Евразия экономикалык комиссиясына, ал эми Тышкы иштер министрлиги КМШнын Аткаруу комитетине маалымдоого тийиш.

Анара Мамытова

Scroll to Top