Бүгүн, 14-ноябрда Кыргызстандын футбол курамасы дүйнө чемпионатына тандоо оюндарынын алкагында Бириккен Араб Эмираттары менен беттеш өткөрөт.
Оюн БАЭнин Абу-Даби шаарында өтүп, Бишкек убактысы боюнча саат 22:15те башталат.
«Ак шумкарлар» кызыл, атаандаштары ак кийимчен ойношот.
Эскерте кетсек, Кыргызстан дүйнө чемпионатына тандоо оюндарынын үчүнчү баскычында 4 оюн өткөрдү. Буга чейинки беттештеринде Кыргызстан Иранга 1:0, Өзбекстанга 2:3 жана Катарга 1:3 эсебинде жеңилип, төртүнчүсүндө Түндүк Кореяны 1:0 менен уткан.
Төрт оюндун жыйынтыгы менен «ак шумкарлар» 3 упайы менен өз тайпасында бешинчи орунду ээлөөдө. Биринчи орунда Иран (10 упай), Өзбекстан экинчи (10 упай), андан кийин Бириккен Араб Эмираттары (4 упай), Катар төртүнчү (4 упай) жана Түндүк Корея (2 упай) акыркы орунда турат.
