Баткен облусундагы фитосанитардык өткөрмө постторунда дарбыз жана коондун курамын текшерүү иштери жүрүүдө. Текшерүүнүн алгачкы жыйынтыгы боюнча, бахча өсүмдүктөрүндө нитраттын өлчөмү нормадан ашкан учурлар катталган жок.

Айыл чарба министрлигинин маалыматында, базарларга сапатсыз жана зыяндуу продукциянын киришин алдын алуу максатында мындай рейддер сезондун аягына чейин үзгүлтүксүз улантылат.

Текшерүүлөр Баткен өсүмдүктөрдү химиялаштыруу, коргоо жана карантин башкармалыгынын адистери тарабынан нитратомер шаймандары менен жүргүзүлүүдө. Бул чаралар калктын ден соолугун коргоо максатында жасалып жатканы айтылды.