Чет өлкөдөгү кыргызстандык жарандар үчүн «Электрондук консул» мобилдик тиркемеси иштелип чыкты. Тышкы иштер министрлигинин маалыматында, тиркеме консулдук кызмат көрсөтүүлөрдүн жеткиликтүүлүгүн жогорулатат.

Тиркеме аркылуу жарандарга төмөнкү кызматтар электрондук форматта жеткиликтүү болот:

• Кыргызстанга кайтып келүүгө күбөлүк тариздөө;
• документтерди талап кылуу;
• кабыл алууга алдын ала жазылуу;
• убактылуу же туруктуу консулдук каттоого туруу.

Мындан тышкары, тиркемеде чет өлкөгө чыгуу эрежелери, консулдук кызматтардын тизмеси жана өлкөнүн чет өлкөлөрдөгү мекемелеринин байланыш маалыматтары камтылган. Өзгөчө кырдаалдар үчүн SOS функциясы каралып, ал жарандарга тиешелүү элчилик же консулдукка ыкчам кайрылуу жөнөтүүгө мүмкүндүк берет.

Учурда тиркеме тесттик режимде иштеп жатат жана Google Play платформасында жеткиликтүү. Жакынкы арада App Store платформасына жайгаштырылат.