Ишкердикти өнүктүрүү фонду иштеп жаткан чакан жана орто бизнес үчүн жеңилдетилген насыяларды бере баштады. Насыялар боюнча пайыздык чен жылдык 6%ды түзөт. Бул тууралуу «Биринчи радионун» эфиринде фонддун жетекчисинин орун басары Адилет Камчыбеков билдирди.

Каржылоо ишкердикти колдоонун мамлекеттик программасынын алкагында берилүүдө. Программа буга чейин чарбалык ишмердүүлүк жүргүзүп жаткан компанияларга багытталган. Жеңилдетилген насыялардан өндүрүш, кайра иштетүү, экспорт, IT жана инновация, ошондой эле туризм, билим берүү жана саламаттыкты сактоо сыяктуу тармактардын ишкерлери пайдалана алышат.