Камчыбек Ташиев 2027-жылдагы президенттик шайлоого талапкерлигин койбой турганын жана азыркы президент Садыр Жапаровду колдой турганын жарыялады. УКМКнын мурдагы башчысынын бул кайрылуусун анын үзөңгүлөшү Өткүрбек Рахманов жарыялады.

Ташиев буга чейин бир нече ирет президенттик шайлоого катышуудан баш тартарын билдиргенин эске салып, анын бул позициясы өзгөрүүсүз каларын баса белгиледи.

Ал ошондой эле алдыдагы шайлоодо азыркы президент Садыр Жапаровду толугу менен колдой турганын маалымдады.

«Өлкөнүн туруктуулугу, мамлекеттик кызыкчылыктар жана элдин биримдиги бардыгынан жогору турат. Мамлекетчил жана патриот катары мен досум Садыр Нургожоевичти колдойм», — деп айтылат кайрылууда.

Мындан тышкары, Ташиев жарандарды анын атынан таратылып жаткан жалган маалыматтарга жана ушактарга ишенбөөгө чакырды. Анын айтымында, мындай басылмалар коомду адаштырууга жана өлкөнүн биримдигине доо кетирүүгө багытталган.